လူမျိုးရေး ပြဿနာကို ဘယ်လိုကိုင်တွယ်ကြမလဲ။
သန်းစိုးလှိုင် (မိုးမခ)၊ ဇွန် ၆ ၊ ၂၀၁၂
မေလ ၂၈ ရက်နေ့က ကျောက်နီမော်ကျေးရွာအနီးမှာ ဖြစ်ပျက်ခဲ့တဲ့ အဖြစ်အပျက်အပေါ် အစပြုပြီး ဇွန်လ ၃ ရက်နေ့မှာ တောင်ကုတ်မြို့မှာ အစ္စလာမ်ဘာသာဝင်တွေ အုပ်စုလိုက် အသတ်ခံ လိုက်ရပါတယ်။
အဲဒီအဖြစ်အပျက်ဖြစ်ပွားတဲ့ ညမှာပဲ စစ်တွေမြို့မှာလည်း ဈေးကောက်ကိစ္စနဲ့ ပတ်သက်ပြီး စကားများရာမှ တဆင့် ရဲစခန်းကို ၀ိုင်းဝန်းတောင်းဆိုမှုဖြစ်ပွားကာ ည သန်းခေါင်အချိန်မှာတော့ သေနတ်နဲ့ ပစ်ခတ်လူစုခွဲတဲ့ အခြေအနေရောက်ရှိခဲ့ပါတယ်။
အခုအဖြစ်အပျက်တွေဟာ လောင်စာရှိပြီးသား နေရာမှာမီးပွားတွေကျတဲ့ အဖြစ်မျိုးလို့ဆိုရင် မမှားနိုင်ပါဘူး။ ဒီလိုလောင်စာတွေအပေါ် မီးပွားမကျအောင် လုပ်ဆောင်ဖို့တာဝန်ရှိသူဟာ အစိုးရ တဦးထဲရဲ့ တာဝန်မဟုတ်တော့ပါ။ နိုင်ငံရေး ပါတီတွေ၊ လူမှုအဖွဲ့အစည်းတွေ၊ ဘာသာရေး ခေါင်းဆောင်တွေ ရပ်မိရပ်ဖ တွေအားလုံးက ၀ိုင်းဝန်းထိမ်းသိမ်းကြရမယ့် အချိန်လည်း ဖြစ်ပါတယ်။
အစိုးရ၊ အာဏာပိုင်က တရားဥပဒေစိုးမိုးရေး အတွက် အဓိကတာဝန်ရှိသလို လူထုအပေါ် သြဇာရှိတဲ့ နိုင်ငံရေးပါတီ ၊ ခေါင်းဆောင်တွေကလည်း အဖြစ်အပျက်ကို သည်းခံကြဖို့၊ ဆင်ခြင်ဉာဏ်နဲ့ တုံ့ပြန်ကြဖို့၊ စိတ်လိုက်မာန်ပါ မလုပ်ကြဖို့ ၀ိုင်းဝန်းပြောဆိုကြဖို့ တာဝန်ရှိပါတယ်။
စစ်တွေမှာဖြစ်ပျက်တဲ့ညက သတင်းကြားချိန်မှာ ပထမဆုံး သတိရတာ နိုင်ငံရေးပါတီပါ၊ စစ်တွေလူထုကို သြဇာရှိတဲ့ လူထုက ယုံကြည်ထောက်ခံတဲ့ နိုင်ငံရေးပါတီက ၀င်ထိန်းရင်ကောင်းမှာပဲလို့ သတိရလိုက်ပါတယ်။ နောက်နေ့မနက်မှာ သိလိုက်ရတာကတော့ အဲဒီညက အခင်းဖြစ်ရာ ရဲစခန်းမှာ ရခိုင်အမျိုးသား တိုးတက်ရေးပါတီ ခေါင်းဆောင် ဒေါက်တာအေးမောင် ရှိနေတယ်ဆိုတာ ကြားလိုက်ရတော့ ဒါမှ နိုင်ငံရေး ခေါင်းဆောင်လို့ စိတ်ထဲ အောက်မေ့မိပါတယ်။ ကိုယ့်ရဲ့ လုံခြုံရေး၊ အန္တရာယ်ထက် လူအများအရေး ကိစ္စကို ဖြေရှင်းပေးဖို့ လုပ်ဆောင်တာဟာ နိုင်ငံရေး ပါတီတရပ်၊ ခေါင်းဆောင်တဦးရဲ့ အရည်အချင်းပဲ လို့ မှတ်ယူထားလို့ ဖြစ်ပါတယ်။
အစိုးရက ဘာတွေလုပ်ဖို့ လိုသလဲ
အစိုးရအနေနဲ့ ယခုထက်ပိုပြီး ပွင့်လင်းဖို့လိုပါတယ်။ မေလ ၂၈ ရက်နေ့က ဖြစ်ပျက်တဲ့အဖြစ်အပျက်ကို ယနေ့ နံနက်သတင်းစာကျမှ ဖေါ်ပြတာမဟုတ်ပဲ အဲဒီရက်ပိုင်းကတည်းက ဖေါ်ပြရမှာပါ၊ အဖြစ်အပျက်ကို ဖေါ်ပြပြီး သက်ဆိုင်ရာ ရဲနဲ့ တရားစီရင်ရေးစနစ်က စစ်ဆေး အရေးယူသွားမယ့်အကြောင်း အဲဒီအချိန်ထဲက ထုတ်ပြန်ရမှာပါ။
ဒီကနေ့နံနက် သတင်းစာမှာ ကျောက်နီမော်ကိစ္စကို ဖေါ်ပြထားတွေ့ရတဲ့ ရခိုင်အမျိုးသမီးတဦးက ပြောရာမှာ “ဒီလို အရေးယူဆောင်ရွက်နေတယ်ဆိုတာကို ဖြစ်ပြီးချင်း ဖေါ်ပြရင် တောင်ကုတ်က အဖြစ်အပျက်တွေတောင် ဖြစ်ချင်မှဖြစ်လာမှာ” လို့ဝေဘန်ပါတယ်။
အဲလိုမထုတ်ပြန်ခဲ့တဲ့အဖြစ်ကြောင့် ရခိုင်လူထုဟာ အခြားနည်းလမ်းတွေကရတဲ့ သွေးထိုးလှုံ့ဆော်မှုပါတဲ့ သတင်းတွေနဲ့ လက်စားခြေဖို့ စီစဉ်ကြတဲ့ အဖြစ်မျိုး ဖြစ်လာတယ်ဆိုရင် မမှားပါဘူး။
တောင်ကုတ်မြို့မှာ အခင်းဖြစ်ပွားမယ့် မနက်ပိုင်းက ကျောက်နီမော်ကိစ္စအကြောင်း မန္တလေးဂေဇက်လို့ အမည်ရှိတဲ့ အွန်လိုင်း ၀က်ဆိုက်တခုမှကူးယူသူက ကူးယူပြီး လှုံ့ဆော်စာတွေ ဝေထားပါတယ်။
အစိုးရရဲ့ တရားဝင်သတင်းထုတ်ပြန်ရေးက မထုတ်ပြန်ပဲထားတော့ အဲဒီ ၀က်ဆိုက်က လှုံ့ဆော်တဲ့ သတင်းက လူတွေရဲ့ စိတ်ခံစားမှုကို မြင့်တက်စေခဲ့တာလည်း ဖြစ်ပါတယ်။
ဒီအဖြစ်ကိုကြည့်ခြင်းအားဖြင့် ယနေ့ခေတ်မှာ သတင်းစီးဆင်းမှုကို တားမြစ်ဖို့ ပိတ်ပင်ထားဖို့ မလွယ်တော့ပါဘူး၊ အင်တာနက်က မြို့တိုင်းလောက်မှာ လက်လှမ်းမီနေတဲ့ ကာလဖြစ်လို့ စစ်တွေမှာ ညက ဖြစ်တဲ့အဖြစ်ကို ညတွင်းချင်း မဟုတ်တောင် နံနက်မိုးလင်းတာနဲ့ ကမ္ဘာဟိုဘက်ခြမ်းထိ သိနေကြပါပြီ။
အစိုးရအနေနဲ့ အရင်ခေတ်ကလို တနေရာမှာဖြစ်တာကို အခြားတနေရာက ရေဒီယိုမှာပါမှသိတာမျိုး၊ သတင်းစာမှာပါမှသိတဲ့ ခေတ်မျိုးမဟုတ်တော့တာကို နားလည်ရပါမယ်။ ပိတ်ဆို့လို့ မရတော့တဲ့ ခေတ်မှာ အဖြစ်အပျက်ကို အရင်းအတိုင်း တင်ပြတဲ့ သတင်း၊ လှုံ့ဆော်မှု မပါတဲ့ သတင်းမျိုးကို မြန်မြန်ဆန်ဆန် တင်ပြကြမှ မဖြစ်သင့်တာတွေ မဖြစ်ပဲ တားဆီးနိုင်မှာဖြစ်ပါတယ်။
ပြည်သူတွေကိုယ်တိုင်လည်း နောက်ကြောင်းပြန်မလှည့်ဖို့ လို
အခုလတ်တလော အခြေအနေမှာတော့ ကျောက်နီမော်ကိစ္စ၊ တောင်ကုတ်ကိစ္စကို ဘယ်လိုဖြေရှင်းသလဲ ဆိုတာကို လူထုက စောင့်ကြည့်နေမှာ သေချာပါတယ်။ အစိုးရအနေနဲ့ တရားဥပဒေ စိုးမိုးရေးရှိတယ်ဆိုတာကို ပြသဖို့လိုအပ်သလို ဖြစ်ပျက်တဲ့ အဖြစ်အပျက်တွေကိုလည်း လူထုကို အချိန်မဆိုင်း အသိပေးသွားရမှာ ဖြစ်ပါတယ်။
လူထုခေါင်းဆောင်တွေ၊ နိုင်ငံရေးခေါင်းဆောင်တွေ၊ လူမှုအဖွဲ့အစည်းခေါင်းဆောင်၊ ဘာသာရေးခေါင်းဆောင် အားလုံးလည်း အစိုးရကိုသာ တာဝန်ပုံမချပဲ တတ်နိုင်သရွေ့ လူထုကို ၀ိုင်းဝန်းထိန်းသိမ်း ကြဖို့ အလိုအပ်ဆုံး အချိန်ဖြစ်တယ်ဆိုတာ တင်ပြလိုက်ပါတယ်။
ဒါ့အပြင် လူထုကိုယ်တိုင်ကလည်း လက်ရှိ တိုင်းပြည်ရဲ့ နိုင်ငံရေး၊ စီးပွားရေး၊ လူမှုရေး ပြုပြင်ပြောင်းလဲမှုတွေ၊ အလားအလာတွေမှာ ဘယ်လောက်တောင် အကောင်းမြင်တယ်၊ မျှော်လင့်ချက်ထားတယ်၊ ယုံကြည်မှုရှိတယ်၊ အစိုးရအပြင် အခြားမဏ္ဍိုင်တွေဖြစ်တဲ့ အတိုက်အခံတွေ၊ သတင်းမီဒီယာတွေ၊ ဘာသာရေးနဲ့ လူမှုရေးအစုအဖွဲ့တွေ အားလုံးနဲ့ ဘယ်လိုမျိုး အကောင်းဆုံး အဖြေကို ရှာနိုင်တယ်ဆိုတာကိုလည်း အခု အရေးအခင်းကနေ မှတ်ကျောက် တင်နိုင်လိမ့်မယ်လို့ ရေးသားလိုက်ပါတယ်။
Comments